Lansio ymgynghoriad ar gyfer Prosiect Tywi Teifi Green GEN Cymru
Mae Green GEN Cymru wedi lansio ymgynghoriad ar ddiweddariad o lwybr ar gyfer ei brosiect Tywi Teifi, a fydd yn cysylltu ynni adnewyddadwy â chartrefi a busnesau. Cynhelir yr ymgynghoriad rhwng 5 Mawrth a 16 Ebrill 2025 ac mae’n rhoi’r cyfle i bobl roi adborth a dylanwadu ar sut y caiff y prosiect ei ddatblygu.
Mae’r aliniad newydd yn cynnwys dwy ran o danddaearu – un ger Bryn Myrddin, i gydnabod ei arwyddocâd diwylliannol a hanesyddol, a’r ail ger Llandyfaelog i helpu i reoli effeithiau gweledol yn yr ardal hon.
Mewn adrannau eraill, mae Green GEN Cymru wedi diweddaru aliniad y llwybr mewn ymateb i adborth gan y cyhoedd ac asesiadau amgylcheddol parhaus. Mae rhannau ger Cwmann a Llanllwni wedi’u diweddaru i fod ymhellach i ffwrdd o’r pentrefi, o gymharu â’r llwybr blaenorol, ac ym mhob ardal, mae lleoliadau peilonau wedi’u dewis i leihau’r effeithiau ar gymunedau a’r dirwedd.
Mae prosiect Tywi Teifi yn rhan o gynlluniau Green GEN Cymru i ychwanegu capasiti grid sydd ei angen i ddatgloi potensial ynni Cymru a galluogi’r trawsnewidiad sero net. Byddai prosiect Tywi Teifi yn cysylltu Parc Ynni Lan Fawr, sydd wedi’i leoli i’r dwyrain o Landdewi Brefi, Ceredigion, ag is-orsaf newydd y Grid Cenedlaethol yn Llandyfaelog, Sir Gaerfyrddin.
Bydd y cysylltiad newydd hefyd yn dod yn rhan o rwydwaith mwy gwydn ar gyfer y rhanbarth – gan greu capasiti i gefnogi buddsoddiad lleol a darparu ar gyfer dyfodol lle bydd y galw am drydan yn cynyddu’n sylweddol i wresogi cartrefi ac adeiladau, ac i wefru cerbydau domestig ac amaethyddol.
Bydd y dyluniad manylach yn rhoi ymdeimlad llawer gwell i bobl o sut y gallai'r cysylltiad edrych o ble maent yn byw. Mae Green GEN Cymru nawr yn gofyn i bobl roi eu hadborth ar y cynigion fel y gall barhau i edrych ar ffyrdd o reoli effeithiau'r cysylltiad. Gall pobl ddarganfod mwy am brosiect Tywi Teifi ar wefan y prosiect www.greengentowyteifi.com. Dywedodd Danny James, Uwch Reolwr Prosiect y Prosiect:
“Rydym wedi ystyried yn ofalus yr adborth a gawsom i’n hymgynghoriad cyntaf ac wedi diweddaru ein cynigion mewn ymateb. Rydym yn gweithio'n galed i gadw effeithiau ar gymunedau mor isel ag y gallwn, tra'n cydbwyso'r effeithiau ar y dirwedd a'r amgylchedd, a chwrdd â'n dyletswydd i gyflawni prosiect cost-effeithiol.
“Mae’r prosiect yn dal yn agored i ddylanwad ac rydym yn annog trigolion i roi adborth mor fanwl ag y gallant. Rydym wedi ymrwymo i barhau i wrando ar gymunedau a mireinio’r cynlluniau ymhellach.
“Rydym yn cynnal chwe digwyddiad cymunedol ar hyd y llwybr lle bydd trigolion yn gallu cwrdd â thîm y prosiect a gweld model 3D digidol o’r llwybr. Edrychwn ymlaen at siarad â chymunedau a rhanddeiliaid lleol am ein cynigion diweddaraf a chroesawn unrhyw adborth.”